زلاغيط
تصنيف التدوينة: 

 

زلاغيط(*)


زلغوطة شرطي المرور
آويها ..من تحت الشمسية
أويها الصفارة بخمسمية
آويهامن صبحية لعشية
آويها ...والمعلم ناطر الإكرامية
لوللولليش...



زلغوطة الجمركجي

آويها ...باليورو وبالدولار
آويها... ودهب ضد النار
آويها...واللي درس كان حمار
آويها...هذا من فضل الجبّار .
للوللوللولييش



زلغوطة رجل الأمن

آويها ...لا الأرض بتحملك ولا السما بترفعك
آويها... ولا أبوك بيلمحك ولا أمك بتقشعك
آويها... وما فيه شي إلا المصاري بتنفعك
آويها.... وراحت عليك ..يا مسكين إذا ما معك
للو للو لييش    زلغوطة القاضي

آويها...ميزان عدلي عالغرام معيّرو
آويها....غرام الدهب والماس أوعى تغيّرو
آويها ...المطرقة والصولجان عراسك بكسرو
آويها....كسري صعب ما فيك إنت تجبّروا
للي للي للي ليش  

زلغوطة موظف بالعقارية

آويها...مين رشى صحابو ,لقى الطابو
آويها... لا يغرك الأسد إذا شفت نابو
آويها... والسهم إذا فلّت من قرابو
آويها... ضاع الزرع والبيت والكرم وترابو
للي للي للي ليش


زلغوطة التاجر

آويها...أرباحي مية بالمية
آويها... بضاعة مهرّبة مو محلية
آويها... هيي شطارة افهم يا عينيي
آويها... بكل الحكومات إلنا الأولوية
للي للي للي ليش    
زلغوطة البلدية:
آويها...البلد وبهدلناها
آويها... الناس وشلّحناها
آويها...البلدية وشو معناها
آويها ...ما بتفهمها يا طه
آويها...تاتلحس من وراها

للي للي للي لييش

* الزلغوطة : هي أهزوجة شعبية تطلق في قمة الفرح وذلك في الأعراس والليالي الملاح تبدا بآويها ...وتنتهي بللولول ليش..وذلك بتحريك اللسان يمينا ويسارا بسرعة .

** الحقوق محفوظة ..مع قطرميظ المخلل .

إضافة تعليق جديد