منام

مدخل

دَقْ السَّهَرْ عَالْنَّوْمْ
قَلْلو فْتِاحْ
جِايِبْ مَعِي تِفِّاحْ
وْنِسْوِانْ مِتْلِ الكَسْتَنا
بْيِحْلُوا إِذَا نامُوا عَلَى تَخْتِ الجَمِرْ
بْيِحلُوا وْبِيصيرُوا عَسَلْ
مِتْلِ الْبَلَحْ
بِينامْ، بيْفيقِ الْصُّبَحُ صَاير تَـمْرِ!!
والنَّوْمْ قَلُّلو لَلسَّهَرْ
أَهْلا وْسَهْلا فُوتْ
وِْفْتاحْ.. في مَعَكْ مِفْتاحْ.

فَاتِ السَّهَرْ
ضَوَّا الْعَتِمْ
صَارِت الأُوْضَه وِاسْعَه…

مَشْهَدِ القَبايلْ

شِايفْ قَبايِلْ نَطَّرُوها بِالشَّمِسْ
دِبْلِتْ مِتِلْ خَيِّالْ عَالمُهْرا نِعِسْ
وِقِعِ الرُّمُحْ
وِقْعُوا كْتافُو.. تْدَنْدَلُوا
وِقْعُوا الإدَيْنِ القَاتَلُوا وِتْمَرجَلُوا
وْكَتْبُوا شِعِرْ.. وِتْأَمَّلُوا
في إيْدْ وِقْعِتْ بِالَّرمِلْ
صَارِتْ وَتَدْ
في إِيْدْ وِقْعِتْ بِالْقَلَمْ
رِجِعِ الحَكِيْ مِنْ أَوَّلُوْ

مَشْهَدْ المُتَنَبِّيْ

شايِفْ كَإِنَّا الْشَّمْسْ عَمْ تِلْعَبْ
رِكْبِتْ عَلى فَرَسِ البْرِقْ
مِتْلِ اللَّهَبْ
مِتْلِ اللِّي حَطِّ السَّيْفْ
بِيْإيْدِ الْغَضَبْ
شَايفْ أَبُو الطَّيِّبْ عَبَوِّابةْ حَلَبْ
رِاكبْ عَلَى حْصَانِ الزَّمَنْ
حَاطِطْ وَرَا ضَهْرُو مَرَا
مْخَبِّيْ تَحِتْ دَقْنُو نَبِيْ
وْجِايِبْ شِعِرْ مِتْلِ الدَّهَبْ

عصام العبد الله