افتتاحية موسى زغيب

أنا إنتو أنا لا تسألوني
لشو طل القسا بعقدِة جفوني
فطمِت جودي بَعد ماكِنت بَيدَر
يِجو حبة وحبة ينَقودوني
كِنت إسهَر وشوف الليل أقصَر
من الحلم الـ عمِ يداعِب ظنوني
وما قِدْرِت عَ السريرِ الأم تِسهَر
لَو ما تِشتري يَقظة عيوني
طلَقت فكري بجَوانِح نِسر أسمَر
وصارو يِرفَعوني ويِرفَعوني
حَتى صِرت شوف الأرض أصغَر
مِن اللي عَ التحَدي بيِطلبوني
وصرِت مِن حارسين النار أكفر
وجَننت العَواصِف مِن جنوني
وما كفرني الزمان ولا المقَدّر
فقَط أهلِ المعَنى جَننوني

وما جايي برِفقِة الزغلول إكبَر
عَ أحلام القَساوِة والليونِة
جايي بجَوقتي توّجِ المَنبَر
وخَلي بقَلب هاللجنة الكَريمة
الـ بَعد مابيَعِرفوني
يَعِرفوني

كان الشعِر مِينا بلا مَنارَة
ودَهَب مَدفون بِزوايا الِمغارَة
رِجِع ميشال هالحَفلِة تبَنى
لَقَى محِبين مش صَفقِة تِجارَة
الـ كانو يِهِربو بالأمس منا
كأنو بكاسنا عَدوى ومَرارَة
إجو يِتأكدو إنو المعَنى
حلم أبيَض بِعَينَين العَذارى
يازَغلول لَوالمَوت امتَحَنا
ضَروري نقابِلِ الدهرِ بجَسارَة
دروبِ الشاعِرِ رماح وأسِنة
وعَ تمو الضحك وِبقَلبو المَرارَة
زَجَلنا ملاحم فلسطين غَنى
وكَشَف كِل الوجوه المستَعارَة
وإلي بإسمِ المعَنى في وَطَنا
عبارَة للرئيس وللوزارَة:
إذا مهاجر بِأرض الغَرب جَنى
وإلو عَ مَوطَنو شَوق وحَرارَة
وإذا بَدكن يرَوج لَعِنا
وَدّولو بإسِم لبنان شاعِر
كَإنكن عم توَدّولو سَفارَة

زَجَلنا احتَل ذروِة إزدِهارو
وفَرَض عَ كِل مَوقَف إعتِبارو
انطَلَق عَ الكَون مِن سِجنو المأبد
تـَ يعطي الناس فِكرَة عَنِ عيارو
المطران الِقلاعي ابن لحفد
تغنى والزجَل جَلل وِقارو
والبَطرَك العاقوري توَدد
لـَ ها اللون الحلو وبارَك ثمارو
وحَتى مار افرام بكِل مَعبَد
أناشيد و صَلا للدين صارو
وفخر الدين للأزجال عَدد
وقَصيدو للجَبَل رَجف حجارو
و ناصيف اليازجي البَحرَين أوجَد
رِبي بدَمو المعنى وما استعارو
و إبِن نَخله نشيد الأرز أنشَد
اللغة رِبيِت عَلى خميرِة ديارو
وإلا بالمعَنى ما استشهَد
أميرو وسَيدو ورافِع شِعارو
و عَ أيامو إجا الشحرور أسعد
جناحو مِن سَما بدادون طارو
وعَينين الملِك فاروق جَمد
عَلى كَرة قَصيدو وإبتِكارو
وطريق الشعر للجَوقات عَبد
تـَ حَتى الكِل يِقتِفيو أثارو
وإجا روكز عَلى المَنبَر تمرد
تمرد سيف عَم تِلعَب شفارو
وبَعد ما بَدل وطَعم وجَدد
ونال منِ الثقَة إكليل غارو
افتَتَح دَرب التحَدي بقَلب أبرَد
مِن التلج اسألو الـ عِلقو وتبارو
وبِقي الجَوق الخليلي حِصِن أصمَد
مِن الحِصن الـ كِعي اسكندَر حِصارو
بِقَفلِة حاجبو في ليل أسوَد
عَ هالعِميان ما بيِطلَع نهارو
هَوني بِنصَح الزغلول يِبعَد
أشرَف ما يتَلت إنكِسارو
وبآخِر ملتَقى ألله بيِشهَد
بِقَلب الدير
أيا جَوق مِنا بَدو يلوح بَيرَق إنتِصارو
********
اشهَدي بالدير يا أقدَم قلاعي
عَ سَطوِة جَوق بو الخل الرباعي
ويازَغلول
ما بيِسوى التجَني
الـ ظهَر مِنك عَلى البَث الإذاعي
عِشِت حَدي عَواطِف مستكِنة
وبِإيدي كِنت أطوَع مِن يَراعي
لَكِن من بَعد ما بعِدت عَني
استحى منِ لسانَك لسان الأفاعي
إذا عَ النصر جايي تِمتِحِني
أنا اقواس النصر شَقلِت كواعي
وكِتِر ما الدهر .. بالخِبرَة عَجَني
انوَصَل عِمر الزمان بطول باعي
وشو بَدك تغَني تـَ تغَني ؟؟
أنا بَحر... وإنت صَدفِة بِقاعي
وصِرِت عايِش عَ هاجِس رعب مِني
طَيفي بيِرِعبَك لَو كِنت نايِم
وإسمي بيِرِعبَك لَو كِنت واعي

شِفِت عَ جَبِهتَك مَسحِة كَآبِي
ابتَدا عَ شَيبتَك يِشفق شَبابي
احتِجز حملانَك بقَلب العَمارَة
قَبِل ما يِفلَتو علَيهن ديابي
وحَتى يخبرو جوقَك تبارى
معِ الجَوق الـ ما بِيضَيع إصابِي
بَدك تِلتِجي لـ عَذرا العَذارى
وتِتمَرد عَلى الطين الترابي
ومِنِ البركان .. تِستَقرِض حَرارَة
ومن الجَلمود .. تستقرِض صَلابِي
ومِنِ السبعَين .. تِستقرِض جَسارَة
ومن السلطان .. تِستقرِض إهابِي
ومِنِ الخِيال .. تِستقرِض مَهارَة
و عَ قَلعَة بَينها وبَيني قَرابِي
ان سَرَجت الدهر حتى تشِن غارَة
بيِبقى الدهر أوطى من ركابي
إنت مطرِب معك جَوقِة تِجارَة
قِسِم كَورَس .. قسم يِعزف رَبابِي
وإذا معجَب بِصَوتَك عن جَدارة
عَلَيكِ الأوف والباشا الملحن
علَيه اللحن، وعلَينا الكِتابِي

استِحي منِ البَحريا نَبعَة شحيحَة
ولا تتلت فَضيحَة عَ فَضيحَة
العَين مفَتحَة علَينا بعنايِي
بملوك العامية والفَصيحَة
إنِت بالشعر مِش مِن مستَوايي
وَلا خَرْج المباراة الصحيحَة
إنِت بالـ تلفَزِة خَرج الدعايِي
لـ نينِكس وباتا وصابون رِيحَة
وبَعد ما كِنت نهنهتك كفايِي
وعطَيتك للهَرَب آخِر نَصيحة
بِأيا قلب .. يا زَغلول جايي
عَ شاعر وَثبِة النمر بطموحو
بِعَينو غَضبِة اللبوِة الجَريحَة !!.
وهَلق يا أبو روكز الغالي
عَلى التطمين بِبعَتلَك رِسالي:
لا تفزَع تا يروح التاج منا
بطانِة تاجنا نجوم الليالي
ومتل ما حكيت لما غبت عنا
سهرنا تا وصلنا للاعالي
نام بفَسحِة الوادي تهَنا
عَ أحلام البطولِة والبَسالي
قَطَعنا الدرب وِبقينا بوَطَنا
أسيادِ القَلَم والإرتِجالي
وإذا بيِتغَربَلو رجال المعنى
من الشعار ما بيضَل إلا:
أنا .. وجريس وبطرس والفغالي

افتتاحية زغلول الدامور
اعذِريني يا حروفِ الأبجَديي
إذا ما بَعملِ الواجِب عَلَيي
خسِرِت خَيي اللي مِفضل عَ اولادي وعَلَيي
متل إمي ومتل بَيي
خَمس ساعات صار لو .. مش زيادي
ما حلّو يِبتِدي النسيان فيي
بعزا خَيي رجعت عَزي فؤادي
لأني بِعتِبِر كِل شخص مِنكن
بَعد ما مات خَيي، محَل خَيي

وياقَلعِة بيت مِرِي ما بتِجهَليني
أنا إبنِك وإنتِ بتعرفيني
حملني والدي من الشوف خِلعة
ونَقَلني مِن مَديني عَ مَديني
خلِقِت بِجدَيدتِك وطلعت طَلعَة
تَشِفت الشمس أوطى من جبيني
ومن الشِعاركم شَلعة بِشَلعة
مِشو خواريف عَ شمالي ويَميني
ياقَلعة بيت مري لَو ألف بَلعة
عَطَيتي لـلِتحَداني بعَريني
لـَ خَلي الصوت من قَلعَة لـ قَلعَة
يِدوي متل قنبِلة الـ فَجَرها الأميركان
بهيروشيما الحَزيني
ويا سنة الواحِد وسَبعين
كوني الحَكَم بَين القَساوِة والليوني
اسهَري عَ جَوقة المَرحوم معنا
مِتل ما بتسهَر الأرض الحَنوني
وياموسى بَعد ما المِشرِف جَمَعنا
وعَطَيناكن عَ عَََشرِ شهور موني
المونِة خِلصِت ونحنا رجعنا
اطلبوني يا يَتامى بتوجََدوني
اشبَعو نِحنا قَبِل منكن شبِعنا
البِسونا بصدركن قوني وقوني
احصِدوا...نحنا كَرامِتكن زَرَعنا
اعتدتو تاكلوني بلَيل أعمى
وعلى صياحِ الديوك
بتنكروني

ويا انصار الزجل والعبقريي
ضروري تناصروا موسى عليي
لانو بعد بدو كتير يطلع
تا يوصل عالسماوات العليي
ضروري تزقفولو بكل مطلع
ضروري يشوف جنبو الاكثريي
ضروري عا عيونو الضو يطلع
صلاة الصبح افضل من عشيي
انا ناطر خمير الشعر يطلع
ما راح بفطر على لقمة طريي
واذا خلقي على موسى بيطلع
تأهدم طور موسى عا حراجل
وقبل يارينغ انهي لو القضيي

وإذا بالمِشرِف، بآخر قَصيدي
خَتَم موسى عَلَيي مش بعيدي
أنا تنازَلت عَن حَقي وعَطَيتو
عَ ذوقو بلش يصف الجَريدي
وعند ما بآخِر الجَولة لَقَيتو
عَم يدَبدِب متل طِفلة وَحيدي
عصَرت دَمات عاطِفتي وسَقَيتو
لَقَيتِ الضرب أغلى منِ الطريدي

نَفخ حالو .. عِند ما انكَب زَيتو
وشَمَخ بو الحن بِجناحو النبيدي
وبِدي يعَرّم عَلى أطفال بَيتو
متل مطرِب بِايام الحَصيدي
و تـَ يِتخَلص مِنِ غرورو دَعَيتو
عَ هالحَفلة ع هالعَركِة الجديدي
اشهَدو علَيي و عَ هالحَكي الـ حَكيتو
عَ إيدي تِحرَم دفوف المعَنى
إذا ما ببوّس المَغرور إيدي

يا موسى الحَظ قَدملَك هَدايا
وبنالَك بَيت عَ الأربَع زَوايا
نَصيبَك .. مات نِسرِ الأولاني
الـ كَساكن عِند ما كِنتو عَرايا
ونَصيبَك ما التقَينا بجَو تاني
تـَ تِحتك الشظايا بِالشظايا
ونَصيبَك بَعد ما فِضيو القَناني
لَقَيتَك مِن بَقاياهن بَقايا

أنا لَما الوَطَن كِلو دعاني
تـَ غَني بالمَدايِن والقَرايا
كَرامِة عَين وِلفي الأسمَراني
ما سَفهت الشباب ولا الصبايا
وقَبِل ما الدر يِخلَق عَنِ لساني
لبِسِت بَدلِة زَغاليل الطرايا
ورِياشي بَين أرزِة وسِنِديانِة
إذا بيِتنَفضو بيِبنو سَرايا
عَطَيت الشعر، من روحي، مَعاني
صَرَخ لِبنان: يا نِعم العَطايا
وإذا سَجلت هوني إسطواني
عَ صخر الصم بيصَفي مَرايا
أنا يوسِف .. أنا ألله اصطَفاني
أنا مرَبي المَحى بدَمو الخَطايا
وإذا موسى سمِيك عَ زماني بيِجي
تـَ شَلحو لَوح الوَصايا
يا زَين شعَيب يارِكنِ المَباني
ويا بِن حَمدان ياصَقر المنايا
وإنِت يا حَرب ياخزنِة مَلاني
لا تِهتمو بِتحليل القَضايا
أنا وَحدي إذا بِسرج حصاني
بِسِرجو بكَتف الأربَع مَطايا
وعَناصِر جَوق موسى الكسِرواني
عَشِية شَرفو أربَع فوارِس
وعَ بكرا بيِرجَعو أربع ضحايا