دوّرت

دورت أيام الشتي غير الشتي ما لقيت...
بقيو يلي بقيو و انا لوحدي بقيت...
يا ريت هالعمر اللي هرب يرجع شو ما صار...
ما بعود ياخذني العتب لا ازعل و لا أغار...
وحدي بقعد اشعل حطب وجهي بوجه النار...
خذني معك يا حب شي مشوار و عالسكت وشوشني اسرار
ضيعت من عمري أيام كثار

يا ريت ليلتنا سوا فكرت قلو ظل...
وقفت و هني سكتوا دار ظهره و فل...
فل...
يا ريت هالصيف اللي مضى يرجع و لنو نهار...
بقعد انا و حالي بهدا و براجع الاشعار...
خذني معك يا حب شي مشوار و عالسكت وشوشني اسرار
ضيعت من عمري أيام كثار

وين ال إيدين؟
الحطّت ابريق الشتي فوق الحصير
وين شبابيك
الفات منها الصوت
متل الزمهرير
وين رمان السقف
مقطوف ومعلق
مثل عمر الكبير
لك…عن يا قلبي
متل ه النحل
جوات القفير

حلوه متل قبل الشتي
وبعد الشتي بشوي
إنت وعم تغطّي المسافة بالوقت
بللي طرافن مي
لّمن مرق
قالوا خياله وصّلو وعم يسألوني عليه
بطلّع
اللي قبل منّه مش إلو
والبعد مَنُّه جنان
ما عاد إلا يسألوا
مين الحكوا عنه بكان يا مكان
كل ما خلص بيرجع كأنه بأوله
و جايب معه ألوان
يزيّح دواير مش إلو
بدفاتر الصبيان

يا عمر عمهلك
بعد عندي فرح
تمحي خطوط خطوط
بالطول والعرض
هالأرض وقعت بالفضا
وما بقي من العمر أكثر ما مضى

وحياة روح العشب
وحياة روح المي
يشهد عليّ السجر
ولو كان تحتُه فيّ
لارسملك الشمس
ع صفحة سما زرقا
وِشفلي فقير
يخرتش على طرافا شوي

ونزلت بستان قطّفلك زهر يا روح
وجبتلّك منامات
أحلى من قمر مفتوح
عرفتا رح تشتي الدني من صوتها المبحوح
خمّنت أنه منام
قرّبت وعيّها
نقز مني الحمام
تفاحة الأرض
كانت ع سجر من نور
لمن قطفت الأرض
صارت لحالا تدور

بس تضحكي
بتتلفت الدني حواليها
وبتسمع زلاغيط اسواره
قبل ما تلبسها بايديها
وبترم بعرس الفضا
هالأرض
حتى تزوغ عينيها يلكي بعجل هالوقت
وبتوصل مكاتيب
حاملته طيور
بخلاخيل اجريها

وجَّك جنازة والملك مقتول
والعسكر قبالي
في ناس عم بيحوربو بقصر الملك
وفي ناس ع العالي
خوفي عليهن يكبروا
وخوفي على حالي
رح تنزل عليي الدني
ويتغرَّق خيالي .
نعسان بدي نام
ما في حدا يوصِّل خبر ع الموت
ويقلهن يتهيأوا
جايي الإمام
حامل بإيد الحرب
وبإيد السلام
وعاجبهتو طيور الحمام
ما في حدا يوصل خبر ع الموت
ويقلهن
ما دام صار الموت ريش نعام
ما دام خلصوا اللي بدهن يكتبوا
خلص الكلام
قوس القدح رح يطلع من الشام
جايبلك بعلبك معي
انطرني وأوعا تنام

يارب .. آخر عاصفة
اسمعني بقى رح موت

ماعاد عندي ولا قصيدة حب غنيها
هالنجم ..عم يبعد عن عيون المجوس
والموت قصة.. موت واحكيا
يانجم .. ياملوك المجوس تلفتوا
ضاع النجم وانهار
ايكار ؟… بعيون الخضر عم يحترق ايكار
ع الشمس هروا جوانحه رح ينطفوا بالنار
ماعاد فيي رافقه .. رفرف بصدري وطار
يارب منفى ...
يارب منفى هالقلب منفى حزين
شراع واحد بالقلب مكسور
والطير عم بيموت بالغربة .. يارب
سرب طيور عم يرحل حزين
الموت غربة والبحر غربة
بالصدر عم تصفر ورقات الحرير
والكرم عم بيحصرم بدربي
عالسارية ..عالمركب الضايع ع باب البحر
رفعنا قصيدة حب مشنوفة
لا ابواب طروادة فتحها الريح
ولا العاصفة حكيت شو بتخبي
زخات ..
شتّي يا قمر ايار
بركي الشعر بيموت .. بالغربة

شباك الشتي

مات بيّي
يا قمر ضوي بأرض الدار
الحجل ميت بالقفص وولاد عم بيراشقو بحجار
قلنا في مصطبة وسلم ع باب الدار
وفي عشبة النسيان ع حجار الدار
وفوق في درابزين و في ليلكة تهرهر غياب
وفي ليل مطفي بقلب قنديل التراب
وفي فوق شباك الشتي مفتوح مثل كتاب
وفي فوق ع رفوف الخشب صوت اللي ردوا الباب
وفي فوق .. وطوا صوتكن رح ينأزوا الغيّاب
هرهروا الورقات ع نوم الولاد ..
وهودي أجوا وماكان في ألهن بلاد
ناموا بدفاتر هلي

عيّطوا له

يا خيال .. يا مارق على تراب النهار
قشقش غيابن .. شعّله بهالنار
مثل الورد ع المي .. مثل الولاد الناطرين الفي
عم ينحنوا .. يلمّوا وجوهن عالهدا
عيطولن ما بقي منن حدا؟
عيطلهن يا تراب
بيتسكروا البواب وبيرد الصدى
عيطولن ما بقي منن حدا
بعده الهوى بيدق ع الشباك
مفتكر انن هون
ياهوى رح أخلع الشباك
والله منن هون
البرد بيهرهر على الحيطان
والريح بتسكر البوابي
حطوا اساميهن على وراق الخريف
وفلوا بهالآه

مثل الزمان
بيطلعوا عالنوم بيهرهر تراب
بتبكي عليهن نطرتن حد البواب
بينتهوا .. مثل الفصول بينتهوا
مثل الاسامي بينتهوا .. مثل الزمان
لا بيبتدوا ولا بينتهوا
بيفتحوا قبل الاوان.
من القصايد
فرّت عصافير تلملم القشات بغيابن
وتنقود الكلمات بكتابن
وبقيت على سياج الزمان مخزءة تيابن
نسّلوا عالشوك خيطان الحرير
وبين السجر والفي ماتوا العصافير.
يا قاعدين بهالزمان خلولنا سجرة على مفرق طريق

طوفان

ياموت ما تبكّر ع أيامي
تركني لوحدي وروح
عمري أنا رح لملمه وخبيه
الأيام عم تغرق بهالأيام
والكلمة ل كانت تجي وتروح
غرقت بهالطوفان .. ماتت على شفافي
وحدي أنا .. والليل عم يزحف على كتافي
يامسافر بهالليل خدني معاك وسوح
مطرح ما بدك روح
يا جبال آرارات وينا سفينة نوح
وحدي أنا والناس عم تغرق بهالطوفان
شراع العمر ناطر هبوب الريح
والموج يلي خرطش بأيده ع هالعالم سطور
جايي تيمحي حكايته العالم مع الطوفان
والفلك عم بيدور
يامركبي .. يامركبي رح نفترق يا مركبي
هي آخر السفرة معك
شو العمر .. بكرا بعاصفة المقداف رح بيودعك
لمّن عيوني تزوغ بدها تلمحك عم تختفي
ومابعود فيي أقشعك .. غني ولنو شوي
بلكي بسمعك
يامركبي الختيار .. رح أغرق معك

نادرك للنار
يا دني
ما بتعرفيني يا دني؟
ما بتعرفي شي طير
ميت بالسجر
مافي نقطة زيت بسراج القمر
تضوّي سفينة موت
لطيور السفر
تكسّروا قلوعي ..رح انشر شراع المطر
ودور عليكي يا دني
...
طفّوا قناديل الشتي رح يرحلوا شو ضل
نتفة تلج ع سطوح التراب؟
بكرا بيجي بيتنوقص من الباب
وبيسكر شبابيك بيتو يا دني
...
يابني.. يابني أنا سجرة بهالجرد البعيد
بيهرهروا وراقي
والطير يلي تقصفّو جناحو
بيكبي على فراقي
يابني مضوي غيبتك يابني بزهرة بيلسان
ونادرك للنار
لنجمة الصبح حد باب الدار
ودور عليكي يادني

بعد بكير

اشتقت شوف منام
ولنو على صفصاف صوتك بالهوى
يوطئ حمام
وما أجى ببالي أنا ونسيان
شوف الوقت حفيان
راكب بالحئادي عازمه نيسان
حلوة مثل ليلة قدر نزلت على بستان
مثل القمر .. مثل القمر قد ما قطفت منه
بيرجع مثل ما كان
والليل مارق بالنهار وما حدا دريان
حلوة مثل نعست حلب
نسيت تنام كثير
مثل البنت
عم تركض بنوما تتكمش عصافير
وبتفيق بتلاقي عالمخدة بعد بكير
حلوة مثل منامات الصيف
لو نسّم هوى بتطير
حلوة مثل تدمر عم تجهّز صبية
وماحدا بيعرف شو بده يصير

ارسملي بنت حلوة متل شي ميدنة
وخبي الأدان بجيبتا
وارسُم صبح ونطّروا عالسطر
مايخلي حدا يتنئوز عليها بدواير غيبتا
واركُض .. اركُض في همزة بطرف هالخيط
اوعى تفلتا
غط القلم بالبحر .. مي كتير
لوّن نومتا وطيّر ..
طيّر مراكب بالهوا
وخدلك شي غفوة بدروتا
وفتاح شي قوسين
متل بنتين استحوا
و شي ارض فاضت ميّتا
وارسُم بيت وباب
متل خزانة عصافير
طارت درفتا
وقد ما فيك شبابيك العين
وسّع فتحتا
تأنى..تأنى ع شو مستعجل
تأنى على العتبة ارسمها كرز
ت نشوف بركي قطفتا
عروس صابيعا اجت عالزيح
نسيت دعستا
فاقت ع قصة بتنتهي ب "الله"
ورجعت نسيتا
وداروا طواحين الهوى
بالضحك لما حكيتا
* * *
هب الهوى
تهدّى رح تطير النقط
ويمكن تشتي ساعتا
وتركض على قوس القدح غزلان قشعت ميتا
كان النعس بستان ..عبت سلتا
رفّع الخط شوي .. احلى الخيزران
ياعين شو حلو النعس غفيان
حط الارض ع الدفتر
وجر القلم ع دورتا
بيوقع برتقان القمر عالنوم
فوق مخدتا
أي برمت الأرض كتير يمكن حاجتا

تمنيت حالي ذهب
ت صير متل الشام...
وتغار مني حلب وماعود فيي نام
هالموت ع ظهر الفرس مارق بهالأيام..
والناس ع كتر النعس كل ما مرق بتنام