حفيدي
سأحدثك قليلا ,اليوم عن زمننا :


بأيامنا كان فيه شرطي مرور ,معتر مسكين , تركتو الدولة بالشارع منشان يلم رزقه ويطعمي عياله , وتركتو قصد منشان تعرف الناس إنو فعلا فيه فساد ورشاوي , والدليل ..آلولو..وطالما الرشوة شغالة عندو فأكيد موجودة عند الأعلى منو .
كانت شركة الموبايل تحاسبنا عالدقيقة وتاخد منا ضريبة لأنو ناتعين موبايل . .
وعلى أيامنا كان فيه نظام شرائح...بكل شي , شرائح بالمي وشرائح بالكهربا وشراشح بالشارع...وإنت شريحة ..وخود عا ريحة .
على أيامنا ...كان فيه بونات , وكان دفتر العيلة متل جلاء ولد بالصف الأول ...وكان فيه مكدوس .
على ايامنا كانت الناس بتتحاسب على تهم متل : إضعاف الشعور القومي , والوقوف ضد النظام الإشتراكي ..وشي من هالعيار ...
مو متل أيامكم ...بتتحاسبو على مناهضة الخصخصة , ومحاربة الإحتكار , والتمنع عن التكلم بالخليوي , والتشهير بالقطاع الخاص , والقدح والذم بالبنوك وبالعولمة ..
على أيامنا ..كانت البلدية ..قطاع عام .. يعني برشوة بسيطة بتمشي أكبر معاملة , مو متل هلأ ...
البلدية قطاع خاص بتمشي بالريموت , والمعاملات كروت شحن وعبيلي لعبيلك والصلاحية 90 يوم .
وكان على ايامنا فيه ناس بتزرع ..وتنتظر الموسم وتحصد , مو متل أيامكم ...كل العالم فتحت دكاكين , ماعاد حدا زرع ...ما بتوفي ..
وكان على أيامنا فيه ناس بتظن إنو بكرا أحسن...
ومن جد وجد ..
ومن سار على الدرب وصل
ما كانوا عارفين ..شو ناطرهم ...كل عشرة احدعش بعلبة معقمة ومحفوظة ومختومة ... مهوي هاي الشي الوحيد اللي ندموا عليه بعدين ..إنو سكّروا معمل الكونسروة بجبلة ..
ماكانوا عارفين شو أهميته الإستراتيجية ..وإنو راح يعوزوه بعدين .